Document 1938

Alienora, et cetera, inclite et magnifice Beatrici, per eandem ducisse Bavarie, Palatine et Renensi, sorori nostre karissime, salutem et sororie dileccionis affectum et omnium felicium incrementa. Soror carissima, Dedericus de Taborem, miles Theotonicus, lator presencium, captus olim de mense novembris anni nuper elapsi per gentem nostram in quodam conflictu habito in regno nostro Maioricarum inter gentem ipsam et inclitum Iacobum de Montepessulano, quondam, cum quo miles ipse venerat ad invadendum regnum predictum, tanquam inscius contra quem bella gerebant, et propterea carceri, simul cum multis aliis cum eo captis, regio mancipatus, a quo statim fecimus liberari, post residenciam quam ex tunc usque nunc miles ipse, de beneplacito nostro, fecit in curia nostra in nostra presencia constitutus, nobis humilter supplicavit ut casum sue capcionis ac liberacionis ipsius, ne forte aliter quam sibi contigit, vestre magnificencie narraretur, eidem magnificencie vestre nostris literis scribere dignaremus. Nos itaque, suplicacione ipsius communite, magnificenciam vestram per dilectum nostrum Gerardum BruniGerardum Bruni, de Diest, elemosinarium et capellanum serenissimi principis regis Petri, domini et viri nostri karissimi, quem ad presenciam vestram, pro ceteris aliis negociis destinamus, tanquam de casu ipsius militis plenarie instructum, duximus informandam. Idcirco magnificenciam vestram rogamus quatenus intuitu nostri honoris suscipientes dictum debitum recomendatum, relatibus prefati GerardiGerardi vobis super hoc proferendis fidem indubiam velitis et placeat adhibere.
Data Perpiniani nonas novembris anno Domini millesimo CCCº quinquagesimo. Bernardus.
Domina regina mandavit michi Iacobo de Alafranco.