Document 1739

[Al marge] V solidos iaccenses.
Petrus, et cetera, dilecto consiliario nostro Iohanni Luppi de Sesse, militi, iusticie Aragonie, vel eius locum tenenti, salutem et dileccionem. Cum ex causa per vos cognosci providerimus et velimus de omnibus et singulis causis, litibus, questionibus, accusationibus, denuntiationibus et controversiis civilibus et criminalibus, tam motis quam movendis, contra Samuelem FichelSamuelem Fichel, iudeum, minimum /mimmummimmum\ civitatis Cesarauguste, et Oro, uxorem suam, et eos tangentes qualicumque racione seu causa, ideo vobis dicimus, comittimus et mandamus expresse, de certa sciencia et consulte, quatenus cognoscatis de eis et faciatis ac decernatis in ipsis, vocatis vocandis, quod de iure et racione ac de ritu ebraico fuerit faciendum. Volumus tamen et vobis expresse mandamus quod propter acusationes vel denunciationes contra dictos coniuges maliciose factas nullatenus eos capiatis vel ipsorum alterum, set casu quo eos vel ipsorum aliquem ceperitis, precedente iusta et legittima denunciatione vel accusatione, tunc procedatis in eos prout exhigent ius et racio et ritus ebraicus, ut est dictum; taliter in hiis vos habendo quod dicti iudei per maliciam alicuius indebite non vexentur, immo preserventur quantum in vobis fuerit ab inanibus, sumptibus et expensis. Nos enim vobis in predictis et circa ea cum dependentibus, emergentibus et connexis vices nostras comittimus plenarie per presentes.
Data Calataiubi sub nostro sigillo secreto XVIIIº die februarii anno a Nativitate Domini MºCCCºLº nono. Visa Roma.
Iacobus Conesa mandato regio, facto per Eximinum Petri de Salanova, auditorem, qui eam misit dictanda.
Probata.