Document 1936

Alienora, et cetera, venerabili et religiose divina providencia abbatisse monasterii Undecim Milium Virginum Beatarum in Colonia, salutem et dileccionis affectum. Fervor devocionis intrinsice quam, teste Deo, circa cunctas gloriosas et sanctas virgines et martires Dei, presertim dictas undecim milia virgines, et per consequens ipsarum preciosas reliquias gerimus ac vestra caritativa liberalitas, cuius fama laudabilis in omnibus sanctis et largifluis operibus nobis insonuit, et de qua propterea spem fertilem assumimus, merito nos inducunt ut unum corpus ex corporibus dictarum beatarum virginum a vobis dictorum corporum copiosis totis nostris affectibus appetamus. Hinc est quod religioni vestre presentibus intimamus quod, cum dilectum nostrum Gerardum BruniGerardum Bruni, de Diest, elemosinarium et capellanum serenissimi principis regis Petri, domini et vir[i] nostri karissimi, maximam de eadem vestra religionis gerens fiduciam p[ro] [ap]poscendo a vobis ex parte nostra dictum corpus, ad vos duxerimus destinandum, cui aliqua super hoc comiseramus vobis ex parte nostra per eum vive vocis oraculo referendo. Idcirco religionem vestram prefatam intimo deprecamur affectu quatenus, relatibus dicti GerardiGerardi super hoc vobis ex parte nostra proferendis fidem credulam exhibendo, certa ipsa pia vota nostra velitis et placeat caritativam religionem vestram ostendere munificam et eciam liberalem, quod placidum eveniet valde nobis, et proinde et Deo et beatis virginibus, ipsis quarum reliquias presencialiter coli cupimus ac pie et venerabiliter revereri vero dignas retribuciones et a nobis expectabitis graciarum uberrimas acciones.
Data Perpiniani nonas novembris anno Domini millesimo CCCº quinquagesimo. Bernardus.
Domina regina mandavit michi Iacobo de Alafranco.